حوزہ نیوز ایجنسی کی رپورٹ کے مطابق، شیعہ علماء کونسل اور ملی یکجہتی کونسل پاکستان کے مرکزی نائب صدر علامہ عارف واحدی نے اپنے ایک بیان میں عالم اسلام کے عظیم اور قابلِ فخر رہنما آیت اللہ العظمٰی امام سید علی حسینی خامنہ ای کے بارے میں امریکی صدر کے توہین آمیز ریمارکس کی شدید مذمت کرتے ہوئے کہا ہے کہ صدر ٹرمپ ایران کے ہاتھوں صیہونی ناجائز ریاست کی بدترین شکست پر شدید بوکھلاہٹ کا شکار ہے، اس لیے وہ آئے روز شائستگی اور تہذیب سے گری ہوئی غیر سنجیدہ زبان استعمال کر رہا ہے۔ مگر یہ ایک حقیقت ہے کہ تمام دنیا کے میڈیا اور انٹیلی جنس ادارے یہ اظہار کرتے نظر آتے ہیں کہ ایران کے مقابلے میں دو ایٹمی طاقتوں کو رسوا کن شکست ہوئی ہے۔
انہوں نے مزید کہا کہ ٹرمپ کے بیانات سے عالَم اسلام میں شدید اضطراب اور بے چینی پائی جاتی ہے۔ اس کا یہ لب و لہجہ خود امریکی عوام کے لیے بھی سوالیہ نشان ہے۔
علامہ عارف واحدی نے مراجع تقلید کے قابلِ فخر بیانات کے حوالے سے کہا کہ مراجع عظام کے بیانات سے عالم اسلام کے اضطراب کا پتہ چلتا ہے۔ ہم مرجعیت کے بیانات اور فتاوٰی کی مکمل تائید کرتے ہیں اور ہم یہ سمجھتے ہیں کہ رہبرِ معظم کی توہین عالم اسلام کے ساتھ دشمنی کے مترادف ہے۔ الحمدللّہ ایران کے خلاف عالمی قوانین کو روندتے ہوئے جو جارحیت کی گئی اس کے جواب میں عالَمِ اسلام نے متحد ہو کر ایران کا ساتھ دیا ہے۔ اس وقت عالمی سطح پر بیداری ہے اور سامراجی طاقتوں کی سازشوں کو مسلمان اپنے اتحاد سے ناکام بنائیں گے۔
آپ کا تبصرہ